Предварительные собрания

Урындағы башланғыстарға булышлыҡ итеү программаһына ярашлы көнүҙәк мәсьәләләрҙе халыҡ үҙе билдәләй һәм уны хәл итеүҙә ҡулынан килгәнсә ярҙамлаша. Проект буйынса 2014 йылдан Байдәүләт ауыл биләмәһендә байтаҡ эштәр башҡарылды: зыяраттар кәртәләнде, күпер сафҡа килтерелде, клубтарға яңы һулыш индерелде. Киләсәктә лә был шәп программа биргән мөмкинлекте ҡулдан ысҡындырмағанда, ауыл халҡы ҡайһы бер үҙҙәренең генә көсөнән килмәҫтәй проблемаларҙы хәл итеү мөмкинлеген ала. Шулай итеп, бөгөн Сирғол ауылы халҡы ла үҙ мәсьәләләрен хәл итеү маҡсатында йыйылды.
Сирғол  ауылында тәүге йыйылыш үтте. Байдәүләт ауыл биләмәһе башлығы Ҡолмөхәмәтов Шәһит Ғимран улы халыҡҡа программаның маҡсатын һәм конкурста ҡатнашыу шарттары менән таныштырҙы. Әлбиттә, клубты ремонтлау, ауылдың үҙәк урамын асфальтлау, балалар майҙансығы эшләү кеүек  эштәр  бар. Тәүге йыйылыш бик әүҙем үтте, халыҡ та дәррәү килде, ҡыҙыҡһындырған һорауҙарын бирҙе. Был мәсьәлә тағы ла бер нисә йыйылышта ҡараласаҡ. Әммә ауыл халҡы башлаған эшкә тоғро ҡалып, ниәттәрен тормошҡа ашырыр тип ышанғы килә.